De Sozialminister Claude Haagen (LSAP) äntwert op eng parlamentaresch Fro vum Myriam CECCHETTI (déi Lénk) iwwert déi extrem Ofzich op de klenge Pensiounen fir den Abrëll 2023. Fazit: et ass alles legal.

Op Facebook huet de Sozialminister Claude Haagen haut seng Äntwert gepost, déi hien der Deputéiert Myriam Cecchetti op hir parlamentaresch Fro, firwat déi kleng Renten am Abrëll 2023 sou staark besteiert ginn an d'Ofzich fir Sozialcotisatiounen sou héich sinn, schéckt.

De Minister nennt dofir fënnef Haaptgrënn:

• Et gouf ee Recalcul vun de virgezunnenen Alterspensiounen, den Invaldiepensiounen an de Witwerenten op den 1. Abrëll 2023 gemaach. Dobei gouf gekuckt, ob deen/déi Betraffenen eventuell nach een anere Revenu oder ee Revenu de remplacement (zum Beispill: REVIS/RMG, Krankenentschiedegung, Indemnité de maternité, Indemnitéit bei engem Aarbenchtsaccident, Unfallrent, Chômageindemnitéit) huet, well et gëllen Anti-Kumulbestëmmungen;
• Den neien Indexstand, deen den Abrëll 2023 op 921,40 Punkten geklommen ass;
• D'Ewechfale vum Steierkredit Energie, dee just bis den 31. Mäerz 2023 ausbezuelt gouf;
• En eventuelle Changement vun der perséinlecher Situatioun vum Betraffenen, déi dozou gefouert huet, dass en an eng aner Steierklass komm ass;
• De Wiessel an eng aner Steierklass bedingt duerch aner Elementer, wéi zum Beispill ee Steierkredit, deen d'Steierverwaltung der Pensiounskeess matgedeelt huet.

Gemäss dem Claude Haagen sinn all Pensioune richteg gerechent ginn, et läit kee Feeler vir an et ass alles gesetzeskonform.

Et ass zwar sënnvoll, dass de Minister geäntwert huet, awer de betraffene Leit mat klenge Renten hëlleft et net wierklech weider. Vill Pensionairen musse kucken, mat hiren Hongerrenten de Mount ze iwwerbrécken. Dobei stoungen déi dräi lescht Tripartiteronnen dach alleguer ënnert dem Zeechen, d'Kafkraaft vun eis all ofzesécheren. Trotz Präisdeierecht, musse vill Pensionairen de Rimm nach méi enk zéien, et sief dann, si hate virdrun eng déck Pai an domat dat néidegt Geld fir an eng Zousazpensioun ze investéieren.

Sozial Gerechtegkeet schéngt ee Friemwuert fir Blo-Rout-Gréng ze sinn. D'Altersaarmut, déi elo schon all Dräizéngte Rentner betrëfft, werd weider klammen. Bleift ze hoffen, dass mer keng amerikanesch Zoustänn kréien, wou d'Pensionairen gezwonge sinn, weider ze schaffen fir iwwert d'Ronnen ze kommen oder an engem vun de sëllegen Trailerparken um Rand vun de Stied ze wunnen, well se sech keng richteg Wunnéng oder en Zëmmer an engem Altersheim leeschte kënnen.

Hei ass eng Iwwersetzung op Lëtzebuergesch vum Sozialminister Claude Haagen sénger Äntwert op déi parlamentaresch Fro vum Myriam Cecchetti, déi hien de 16. Abrëll 2023 op Facebook gepost huet. hh.

Äntwert vum Minister vun der Sécurité sociale op d'parlamentaresch Fro n° 7863 iwwer d'Pensiounsbeträg, déi fir den Abrëll 2023 bezuelt goufen

Matdeelung 14/04/2023

Upassunge vum Montant vun de Pensioune fir de Mount Abrëll 2023

Am Kader vun der Äntwert op d'parlamentaresch Fro n° 7863 vum 3. Abrëll 2023 vun der honorabeler Deputéiert Myriam Cecchetti, betreffend d'Pensiounsbeträg fir den Abrëll 2023, déi vun der Pensiounskeess (CNAP) ausbezuelt goufen, wëllt de Sozialministère drop hiweisen, dass d'Berechnunge vun der CNAP no de gesetzleche Bestëmmunge gemaach goufen an dass kee Feeler festgestallt gouf.

D'Schwankung vun de Beträg erkläert sech duerch verschidden Ëmstänn, wéi an der Äntwert op déi uewe genannte parlamentaresch Fro uginn ass an hei ënnendrënner widderholl gëtt.

"Äntwert vum Minister vun der Sécurité sociale op d'parlamentaresch Fro n° 7863 vum 3. Abrëll 2023 vun der honorabeler Deputéiert Madamm Myriam Cecchetti betreffend d'Pensiounsbeträg, déi fir de Mount Abrëll 2023 ausbezuelt goufen.

Am Géigesaz zu deem wat d’honorabel Deputéiert an hirer parlamentarescher Fro undeit, stëmmt d’Berechnung vun de Pensioune fir de Mount Abrëll 2023, wéi se vun der Pensiounskeess (CNAP) gemaach gouf. Bei der Berechnung vun de Pensiounsbeträg fir de Mount Abrëll 2023 gouf kee Rechefehler festgestallt.

D'Ënnerscheeder a Bezuch op d'Beträg kënnen duerch verschidde Faktoren erkläert ginn, dorënner och déi perséinlech Ëmstänn, déi d'Basis vun de Berechnunge sinn.

Tatsächlech kënne verschidde Faktoren d'Pensioune fir de Mount Abrëll 2023 beaflosst hunn, besonnesch:

▪︎ D’Uwendung vum Artikel 230 vum Code de la Sécurité sociale, deen eng Neiberechnung ab dem 1. Abrëll vun der virgezunner Alterspensioun, der Invalidepensioun oder der Witwerent am Fall vum Cumul mat engem Beruffsakommes oder engem Ersatzakommes virgesäit;

▪︎ D'Uwendung vun der neier Indexquote vun 921,40 Punkten;

▪︎ D'Enn vum Steierkredit Energie (CIE), deen ersat duerch de Konjunktursteierkredit (CIC), retroaktiv op den 1. Januar 2023;

▪︎ Eng Ännerung vun der perséinlecher Situatioun, déi en Impakt op d'Steierklass huet.

Wat de Steierkredit Energie (CIE) ugeet, war dës Moossnam vun Ufank un zäitlech begrenzt an säin Oflafdatum war also zanter senger Ëmsetzung bekannt. D’Enn vun dëser Moossnam – déi réckwierkend op den 1. Januar 2023 duerch de Konjunktursteierkredit ersat gëtt - kann nämlech eng Erklärung fir den Ënnerscheed vun den niddregste Pensioune sinn, wéi an der Pressematdeelung vum Ministère vum 29. Mäerz 2023 matgedeelt gouf.

▪︎ Aner Upassunge vun den ausbezuelten Nettobeträg kënnen och aus Ännerung vum Steiersaz entstoen, virun allem duerch eng Verännerung vun der Steierklass, oder engem aneren Element (z.B. Steierkredit), deen d'CNAP vun der Steierverwaltung gemellt kritt.

Wat d'Prozentsätz vun de gesetzleche Cotisatiounen op de Pensiounen ubelaangt, muss drop higewise ginn, datt fir d'Empfänger vun enger perséinlecher Pensioun an enger Witwerent bei der CNAP den Total vun de Sozialbeiträg – an och fir d’Steiere – fir béid Pensiounen integral op eng eenzeg Pensioun berechent ginn, am Prinzip ass dat déi perséinlech Pensioun. Dowéinst muss een de Montant vun de Cotisatiounen um Gesamtbetrag vergläichen an net um Betrag vun enger eenzeler Pensioun.

Als Schlussfolgerung kann een dovun ausgoen, dass déi gesetzlech Bestëmmungen, méi spezifesch wat d'Tauxe vun de Sozialbeiträg ugeet, vun der CNAP korrekt ugewennt ginn."