Zu Wäiswampich kënnt et zu engem Wiessel um Buergermeeschterstull, op deem den Henri Rinnen wärend bal dräi Jorzéngte gepecht huet. Déi spannend Fro ass: Wat kënnt nom Rinnen-Regime?

Mam Briecheise gouf den Tourismusprojet um Wämper Séi vum Henri Rinnen a senge Marionetten duerchgeboxt, obwuel sech an engem Gemengerefendum am August 2019 insgesamt 60,1 Prozent vun de Walberechtegte géint de monstréise Projet vum belsche Promoteur Lamy ausgesprach hunn. Mat dësem Projet huet de Wämper Schäfferot a seng Matleefer en ëffentlecht Areal vu 45 Hektar fir en Apel an ee Stéck Brout un ee privaten Immobilienhai ofginn, deen do en Hotel, ee Funpark, ee Vakanzenduerf eng Waasserschianlag a sou wieder wäert installéieren. De Bedreiwer Lamy huet, laut enger Konventioun tëscht der Gemeng an dem Groupe Lamy, och d’Recht, en Zonk ronderëm dat ganz Gebitt ze zéien, woumat de fräien Zougang zum Séi der Vergaangenheet ugehéiert. De Wämper Schäfferot a seng Vasallen hunn de Projet bis op d’Äusserst verdeedegt, obwuel net emol eng Impaktstudie op méiglech d’Natur- an d’Ëmweltschied gemaach gouf, wat d’Biergerinitiativ Gemeng Wäiswampich schliisslech dozou verleet huet, geriichtlech Schrëtter um Verwaltungsgeriicht anzeleeden. Als Ersatz fir d’Zerstéierung vun hektarweis Bëscher a Gréngfläche brauch de Promoteur Lamy just ganzer 11 jonk Beem ze planzen.

28 Joer Herrschaft vum Rinnen-Clan huet a ville Beräicher seng Spueren hannerlooss. Den typesch, ländleche Charme vum Éislek ass definitiv flöten. Iergendwéi logesch mat engem Buergermeeschter a senge Matleefer, déi aus Wäiswampech en zweete Kierchbierg wëlle maachen. Al an erhalenswäert Bauwierker goufe systematesch dem Äerdbuedem gläichgemaach an duerch steril gro-wäiss Schongkëschten ersat, wéi een der masseweis ronderëm d’Stad, um Ban de Gaasperech oder um Kierchbierg fënnt. De récksiichtslosen Ëmgang vum Wämper Buergermeeschter a sengem Clan ass dofir méi wéi eng Kéier vun den Denkmalschutzassociatioune kritiséiert ginn.

De President vun der Denkmalschutzfederatioun, Paul Ewen, huet d‘Gemengeféierung vu Wäiswampich dowéinst landeswäit als extreemt schlecht Beispill bezeechent, wou einfach "tabula rasa mam Passé“ gemaach gëtt.

Zu wat den Turbowuestum vum Henri Rinnen aus de leschten 28 Joer gefouert huet, gesäit een am beschten un de sëllege Bréifkëschtefirmen, déi zu Wäiswampich een neit Doheem fonnt hunn, dorënner - wie wonnert et - e sëllegen Transportbetriber. Eng Recherche vun 2022 huet erginn, dass an der Gemeng Wäiswampech net manner wéi 671 Societéiten ugemellt sinn, also sou vill wéi a grousse Gemenge wéi Stroossen, Bartreng, Péiteng oder Déifferdeng. Dës Firmen "wunnen" ganz oft zu puer op enger Adress an de sëllege Residencen, déi an de leschte Jore wéi Champignonen aus dem Wämper Buedem geschoss sinn. Well d'Appartementer vun deene Bréifkëschtefirme meeschtens eidel bleiwen, beschlagname si dee batter néidege Wunnraum.

Eng weider Recherche vun 2022 huet erginn, dass 90 Prozent vun den ugebuedenen Appartementer zu Wäiswampich als Büroen oder Gewerberaim verlount ginn.

Hei huet d'Politik grandios versot. Well dës Entreprise vun de Gemengeverantwortleche geduld oder souguer gefërdert ginn, huet Wäiswampich de Ruff vum lokale Steierparadies fir auslännesch Scheinfirmen kritt.

Genausou gläichgülteg ass d’Astellung vun der Nach-Majoritéit a punkto Natur- an Ëmweltschutz. Et ass dofir keen Zoufall, dass ausgerechent Wäiswampich als eenzeg Gemeng kee vollwäertege Member vum Naturpark Our ass.

Déi nei-al Ekipp vum Rinnen-Clan huet och net wëlles, dat ze änneren. Sou kann een et zumindest aus dem Walprogramm vun der „transparenter“ DP-Lëscht schlussfolgeren.

Als villverspriechend Alternativ bidden sech d’Kandidature vum Paul Holweck, President vun der Biergerinitiativ Gemeng Wäiswampich, an dem Vincent Geiben, Grënnungsmember vun der Biergerinitiativ, un. Mat hirem Programm stinn si fir eng wierklech Verännerung vun der Gemengepolitik zu Wäiswampich.

Vu mir also eng ganz kloer Walempfeelung zugonschte vun den zwee Kandidaten Paul Holweck a Vincent Geiben, déi allebéid um Ursprong vun der Biergerinitiativ Gemeng Wäiswampech stinn an domat gewisen hunn, datt hinnen d'Wuel vun den Awunner awer och d'Erhalen vun der Natur an de schützenswäerte Bauwierker um Häerz läit. hh.