Nodeems d’Aarbechten op der CFL-Nordstreck tëscht Wëlwerwolz a Draufelt Ufank Juni 2023 ofgeschloss an déi al Schinnen d’lescht Woch vun enger belscher Firma ewech geholl goufen fir se ze recykléieren, annoncéiert den Transport- an Arméiminister François Bausch (déi Gréng) schonn nees Gleisaarbechten um selwechten Secteur.

A sénger Äntwert vum 3. Juli 2023 op eng parlamentaresch Fro vun der CSV, schreift de François Bausch: "D'Erneierungsaarbechten, déi fir d'Period vum 20. August bis den 10. September geplangt sinn, gesinn eng komplett Erneierung vun de Gleiser (Schinnen, Schwellen a Ballast) tëscht Wëlwerwolz an Draufelt vir." Dobei goufen déi vum Minister Bausch ugekënnegt Gleis-Aarbechten schonn am Abrëll 2023 ausgefouert, wéi dës Informatioun vun den CFL un d'Leit, déi laanscht d'Streck wunnen, beweist.

Entweder weess am Transportministerère déi eng Hand net wat déi aner mécht oder déi nei Schinnen, dee neie Ballast an déi nei Schwellen vum Abrëll ginn no zwee Méint schonn nees ersat, well se schliesslech net méi nei sinn.

Et kann natiirlech och sinn, dass den Arméi- an Transportminister déi Éisleker Leit besonnesch kujenéiere wëllt, aus Roserei fir sech fir dat schlecht Wahlresultat vun de Gréngen bei de Gemengewahlen am Norden ze revanchéieren. hh.