Ëmmer méi Memberen gesinn d’ADR net méi als Alternativ un, well se net demokratesch ass, a well se festgestallt hunn, dass d'Wuert "Reform“ am Numm effektiv dat verkierpert, wat et wierklech bedeit (reform, lat. re = zréck a formare = forméieren), wat de Contraire vu Fortschrëtt an d’Rekonstruktion vun ale Reegelen bedeit. Si verloossen d’Partei. Bedeit dat d’Spaltung vun der ADR?

Dat bekanntenst Beispill ass wuel den Zentrumsdeputéierten Roy Reding, deen 2005 aus der LSAP ausgetrueden a bei den ADR gewiesselt ass, d'ADR dunn awer nees den 30. Juni 2023 verlooss huet, well de Bezierk Zentrum hien net op der Kandidatelëscht fir déi nächst Chamberswahlen zréckbehalen huet awer och well hien een zolitte Problem mam "völkeschen Débat“ huet, deen sech ëmmer méi duerchsetzt. "Völkisch“ ass ee Begrëff, dee laut Duden haaptsächlech am nationalsozialistesche Sënn gebraucht gëtt an ass Synonym fir "nationalistesch“ laut Wiktionary. Iwwert seng Beweeggrënn, d’ADR ze verloossen, huet de Roy Reding als Invité vun der Redaktioun bei RTL geschwat.

Nodeems de Roy Reding vum Frank Engel senger Hokus-Fokuspartei de Kuerf kritt huet, huet hie beschloss, seng eegen Sensibilité politique an der Chamber opzemaachen. An de soziale Medien kënnegt hien seng nei Groupéirung mam Numm "Liberté Chérie“ un, eng Uspillung op d’Fräiheetskämpfer, déi sech géint Tyrannei zur Wier gesat hunn an deenen an der franséischer Nationalhymne "La Marseillaise“ mat de Wierder "Liberté, liberté chérie“ gewierdegt gëtt. "De Numm ass Programm“, präziséiert de Roy Reding.

Ma och am Norden stinn d’Zeechen op Stuerm nodeems „déi Stater“ Lemaire, Keup a Kartheiser zesumme mam Deputéierten Jeff Engelen eleng d’Lëscht fir d’Chamberswahlen zesummegesat hunn, an de Bezierk Norden dobei emgaangen hunn, wat géint d'Artikelen 23, 27, 56 a 59 vun de Parteistatuten verstéisst. Véier Comitésmemberen hu schonn demissionéiert, wéi de Radio 100Komma7 de 6. Juli 2023 gemellt huet.

Fir déi Lieser, déi sech et zoutrauen: hei eng Kostprobe vum "Cowboy" senge Gesangskënschten. Et versteet een, firwat dee jonke Mënsch seng Carrière als Leadsänger un den Nol gehaangen an decidéiert huet, eppes anescht ze maachen. Haut gëtt hien den "Toun" bei der ADR-Jugendsektioun un.

Aus gutt informéierte Quelle krute mer matgedeelt, dass d’ADR d’Publikatioun vun hire Lëschten op Äis geluecht huet fir ze verhënneren, dass nach méi Memberen aus der Partei austrieden. An enger Drénglechkeetsfro hunn sech d’Deputéierte Fernand Kartheiser a Fred Keup un de Chamberspresident Fernand Etgen gewennt a froen, ob et méiglech wär, den Datum vun de Wahlen vum 7. Oktober op d’nächst Joer ze verréckelen bis sech d’Situatioun an der Partei nees berouegt an d’Emfroewäerter vun den ADR-Spëtzeleit nees verbessert hätt. Alternativ dozou kéint een d'Wahlen och ganz ofschafen, sou déi zwee Volléksvertrieder.